Historia om Sivle gard

Ifylgje ættabok frå Vossestrand var den fyrste brukar på Sivle, Knut. Han var brukar i frå 1563.
Men det tyder på at det har vore busetnad her lenge før denne tid.
Fleire funn ved jordarbeiding på garden, viser at her har vore busetnad alt i eldre- og yngre jernalder.
Gjenstandane som vart funne, er i dag oppbevart ved Bergen Museum.
Det skal også liggja ei gravhedla framanfor stovehuset på Sivle, som skal vera frå folkevandringstida 600 e. kr.

Desse tinga frå Sivle gard er i dag på Bergen museum

Sivle var rekna for å vera ein tungdriven gard, men hadde god fødnad (gode avlingar). Garden ligg sørvendt til og det vert tidleg vår, og det er god turk i bakkane.
På 1800-talet var Sivle kjend for å vera ein god korngard, og her har alltid vore drive allsidig gardsbruk med kyr, sau, geit og hest.

Sivle gard fotografert på slutten av 1800-talet frå Kroklie

Under Sivle låg fleire husmannsplassar, ein del av dei er i dag sjølvstendige bruk.
I dag er det igjen to husmannsplassar som høyrer til Sivle, det er Naole` og Hadlhustræet. Hadlhustræet ligg ved Vinelva, der Sivle har skogateig. Her ser ein framleis restar etter grunnmurane.

Bilete frå Sivle, 1902. I bakgrunnen ser du gamle Stalheim hotell.

Naole ligg på ei fjellhylla mellom Sivle og Jordalen, den gamle ferdslevegen til Jordalen gjekk forbi her. Det har vore 4 husmenn i Naole`, den fyrste slo seg ned i ca. 1870. Den siste flytte på 1930 talet.
I dag er huset nedrive, og det er berre murane som står att.